البوابة
[50%] 
أرسلت هذه القصيدة للأخ أبو نديم فواز أبو غازي
حرام البعد حرام يلي جربت الغرام
خاف من الله يا محبوب قلي شو أسباب الخصام
لتنفذ حكم الأعدام
خاف من الله يا محبوب حاجي مثل الشمعة نذوب
واني لبعثلك مكتوب لروحك بهدي السلام
بس تمعن با الكلام
بس تمعن باالحروف واعطف عا قلبي الملهوف
يا اسمر لو أنك بتشوف ها الجسم بحال السقام
كثرت براسي الأوهام
يا أسمر يا نور العين قلي قلبك صفا وين
اسقلا يومن كنا أتنين نتنزه بحقول الشام
ولا نهكل هم اللوام
ولا نهكل هم الحسود يا عليلا الماضي يعود
كل الناس علي شهود من مسيحية وأسلام
لقعد لشخصك خدام
يا اسمر عم حبك ماجوز حتى لو صرت عجوز
لو أني بدين الدروز لعملك مثل المقام
وقدملك صلا وصيام
لبعثلك مع طير الباز قصة حبي يا فواز
ضميتك بين البزاز وأسقيتك منهن مدام
ولا فكرت با الندام
أنت رفيق وأنت صديق وأنت الملجا بيوم الضيق
عا الرحا أن صرلي طريق لضيف وبربوعك نام
عا الدنيا أهل السلام
ياربي وأنت الكريم ويعودلي أبو نديم
أقسم با الله العظيم حرام البعد حرام
ياللي جربت الغرام
وهذا رد من الشاعر بركات المغوش أرسلها اللى الشاعر التي أرسلت له القصيد
وهو فواز أبوغازي
من قرية الرحا
ياللي بتحكم باالأعدام..... عا البعد كيف فيك تنام
راجع حكمك يا محبوب........... بمحكمة النقض بالشام
محارب من أهل الغرام
راجع حكمك يا محبوب...... خلص نفسك من الذنوب
عاجبينك هذا مكتوب .....ترمي الحلوي باالسهام
لعملت لشخصك مقام
لعملت مقام لشخصك....... شو بتوافيها دخلك
سهرت ليالي لأجلك........ وجاي لربوعك لتنام
باالرحا نالت وسام
الوفي لازم يتوافى..... مش عدالي يتجافى
لو أنها جوات يافا.... لازم تفطر بعد صيام
ويوصل لشخصها السلام
وأن ماقبلت النصيحة.... با الرحا لعمل صيحة
بتعرف لو علقت ضوحه ...المغوش عا الضيم ماينام
برجم الحق ألنا كلام
منعرفكم أهل المعروف ....ولا صديتو بوجه ضيوف
جيري من عندي الخروف.... مع جاها وننزل عا الشام
معزبنا حلو الهندام
با الفيحا تحلا السهرات.... لا هموم ولا تنهيدات
هات وجود بفنك هات..... وملي كاسات المدام
عادتلك أحلى الأيام
عا المودة تعاهدنا.... ونار الفرقة بددنا
عدنا يا محبوب عدنا... وصفي الملقا بعد خصام
عا الدنيا أهل السلام
هللي عيونا عيون الباز.... صارت ألك يا فواز
معقب لكل العواز.... وديارك تبقى علام
تشمخ عا مدى الأيام
بركات المغوش - خلخله
رد العم حسن أبو غازي على القصيدة
ياريم الساكن با الشام.... عا الحب بتصحى وبتنام
قصة حبك يا محبوب........... وصلت وزارة الأعلام
لازم تتصور أفلام
قصة حبك يا محبوب...... هزت للعشاق قلوب
عا الرحا باعث مكتوب.... بتشكي الهجر بدون خصام
ها اللي غايب مابينلام
زور الرحا وفيها نزال.... وعن ولفك فتش وإسأل
بلكي مسافر خلف جبال.... بلكي مرضان ومنضام
ولا مسجون بأحكام
ملغى حكمك يا محكوم.... بأمر من العشاق عموم
كم عاشق مثلك مظلوم.... وكان الظلم من الحكام
ماعندن با العشق التام
محبوبك هللي بيهواك.... قلبو وأمو لو فدواك
أياك تفكر ينساك.... با اليقظة ولا بمنام
لا تستسلم للأوهام
من الرحا أخترت وحبيت بأسم فواز تغنيت
لو ضفتنا وبربوعا بقيت بتعرف أهلا قوم كرام
عاحبك يهدوك وسام
عادتهم تكريم الضيف.... وبربوعن مايطالك حيف
بتسهر عندن سهرة كيف.... وبتسمع أجمل أنغام
وفراشك من ريش نعام
الرحا :حسن أبو غازي
وهذا رد من الشاعر هايل سلمان من قرية ملح أيضاً أرسلها
ألى قرية الرحا
يا عاشق ضبيات الشام... حضيت بعين وألف ولام
كسر القلب الصادق جنفي ...مابتنغفر يا مقدام
با الجدول ألها أحكام
كنك ماعرفت المضمون... روح أطلع عا القانون
حكم الجاني كيف يكون... وانت ارتكبت الأثام
بشرع القاضي والأنام
هللي عشقتا وحبيتا.... من الجهالة أن جافيتا
يا فواز ان عطيتا.... روحك يمكن مش ندام
رقيقة عرفتا من الكلام
عرفتا رقيقة من القصيد ...واللي أني عنا بعيد
أن جافيتا شو بتستفيد.... لا يطغي عليك المرام
وشور الحواسد هدام
هللي بتسأل عنك دوم.... وطير فوق الرحا يحوم
طاوعني غيرا لا تسوم.... من زهيات الهندام
في حبا تقلتدت وسام
لا تهدم عرشك بايدك ....عقبا ماشي بفيدك
وفيها خلي قصيدك ....شوفتها وحي وألهام
وتبقى للعشق مقام
لا تهاب من الخليقة.... صراخ بصوت الحقيقة
القلب بيهوى الأنيقة... من مسيحية وأسلام
ولا بيعرف ترك وأعجام
ظلك جادي يا فواز.... لا تمشي درب النشاز
للمشاعر هذا مجاز.... لا تغوص بحر الأوهام
حرام الجفا حرام
بختمها اربع حروف.... وكاتبها وقافه مصروف
لام وياء وألف تنوف.... والهاء تهديك السلام
من ملح للرحا لشام
هذا الرد هو للشاعر التي أرسلت له القصيدة
وهذا رد الشاعر فواز أبو غازي للقصيدة التي أرسلت له
لا تزيد همومي لا تزيد ....يا عايش عن عيني بعيد
يا مهجة قلبي والروح... ودمي الجاري با الوريد
يوم بشوفك عندي عيد
يللي كلك حنية ....بعمرك مابخلت عليه
لبعثلك قلبي هدية ....ودماتي انكنك بتريد
برسالي وسط البريد
يللي با الشام تربيت.... غيرك ماعشقت وحبيت
لا تفكر للماضي نسيت ....ولا تفكر قلبي حديد
ضناني كثر التنهيد
يا ولفي دور الريان.... باالرحا ملقى الخلان
تانعرف أجمل ألحان.... ويعمل دبكة أيد بأيد
بلكي عهد الماضي نعيد
يا أحلى وأوفىى مخلوق.... كلك لطافي مع ذوق
طيور العاشق والمعشوق.... تعلموا منا التغريد
وصاغوا الحب بلحن جديد
كرمالك لأدعي الأخوان.... على السلطان سليمان
من المغوشش للسلمان.... وكل لشاركنا بقصيد
بضيافة أبو وليد
بهواكي فاض غرامي.... وحبك مصدر ألهامي
شو بنا بحكي كرامي.... أياك الطبع العنيد
لا تحيد ولا أني بحيد
الرحى :فواز أبو غازي
,,,
,,
,
